Monday 19 May 2014

آپ کریں تو رام لیلا ۔۔ ہم کریں تو کریکٹر ڈھیلا؟

تو خیر سے جیو کا مرننگ شو بند ہوگیا ۔۔۔ وجہ بنی گستاخی اہل بیت

بالکل ۔۔ وقت آگیا ہے کہ کونٹنٹ لیس پروگرامز جن میں صرف شور شرابہ غل غپاڑہ ہوتا ہو اسے بند کردیا جائے، اور ایسے پروگرامز لائے جائیں جن سے تربیت کا کچھ تو عمل ہو

دینی بگاڑ پیدا کرنے والے پروگرام کو بند کرنے کے بعد ۔۔ یہ ایک موقع ہے ہمارے لیئے ۔۔ کہ صرف دینی بگاڑ نہیں ۔۔۔ معاشرتی بگاڑ پیدا کرنے والے شوز کو بھی بند کیا جائے؟

اب قوم فیصلہ کر ہی لے کہ وہ شادی بیاہ مہندی مایوں والے شوز نہیں دیکھے گی ۔۔ ارے لیکن قوم یہ فیصلہ کیسے کرے؟ قوم تو ان مارننگ شوز والوں کو بلا بلا کر اپنے گھر میں شادی رچواتی ہے ۔۔ نہیں؟

یہ خواہ مخواہ کے سیلیبریٹیز، نہیں مطلب واقعی خوام مخواہ کے ۔۔ مطلب کون جانتا ہے انھیں؟ آپ؟ آپ؟ بھائی آپ؟ نہیں ناں ۔۔ تو جب کوئی نہیں جانتا، تو کون یہ جاننا چاہے گا، کہ ان کی کھیر کھلائی ہوگئی، ان کی جوتا چھپائی ہوگئی ۔۔۔۔ ان کی گھوڑا چھکائی ہوگئی 


قوم فیصلہ کرلے کہ جن بھوت آسیب پری اور دیگر غیر مرعی مخلوقات نکلوانے والے شو کیخلاف بھی ایسے ہی سراپا احتجاج ہوگی ۔۔ ارے مگر یہ ہی قوم تو ایسے شوز میں آکر اپنے اپنے جن بھوت نکلوا رہی ہوتی ہے ۔۔ نہیں؟

یک تو ویسے ہی ملک توہمات کا شکار ہے، اوپر سے یہ جن نکالنے والے آئیٹم ۔۔ نہیں مطلب اتنی آسانی سے؟ کوئی چائینا کا جنا ہے بھئی 


قوم فیصلہ کرلے کہ دیورانی جٹھانی ساس بہو رانی جیسے اہم قومی مسائل والے پروگرامز ۔۔ اور ان پروگرامز میں ماہر منجھی ہوئی اینیلسٹ آںٹیوں کا بھی بائیکاٹ کرے گی ۔۔ لیکن ان شوز میں بیٹھی خواتین کو نہ ہی بھارتی ایجنٹوں نے بھیجا ہے، نہ ہی اینیلسٹ آنٹیاں اور کچھ ویلے انکل یہود و نصاری٘ کے بھیجے ہوئے ہیں ۔۔۔ یہ تو عین پاکستانی ہیں ۔۔ نہیں؟

یہ آنٹیاں کون ہیں ۔۔ کیوں ہیں ۔۔ اور یہ بیٹھ کر کیا کہہ رہی ہوتی ہیں ۔۔۔ کیوں کہہ رہی ہوتی ہیں ۔۔۔ اپنی ذات میں خاندانی نظام پہ وشیش ٹمپنی دینے والی یہ آنٹیاں، اتنی ہی خاندانی ہوتیں ۔۔ تو صبح گھر پہ اپنے میاں کو چائے کیک رس کھلانے کے بجائے ٹی وی پہ بیٹھی ہوتیں؟


قوم فیصلہ کرلے کہ حرام قرار دیا گیا چینل ہرگز نہیں دیکھیں گے ۔۔ لیکن قبلا خالد آرائیں ۔ اوہ معاف کیجیئے گا ۔۔ مولانا پیر صاحب بڑے حاجی خالد آرائیں جب کیبل پہ کشش کے جھمکے، میناکشی کی آہا، پاروتی کی اپنی ساس کیخلاف سازشیں دکھا رہے تھے، جب وہ پائریٹد فلمیں پاکستان بھر میں چلا رہے تھے ۔۔ وہ تو حلال تھا ۔۔ نہیں؟



بھئی جیو تو چل رہا ہے بیرونی ایجنڈے پہ ۔۔ یعنی بھارتی مواد دکھاتا ہے ،، ترکی ڈرامہ دکھاتا ہے ۔۔۔ اور کون بنے گا کروڑ پتی کون سا محب وطن چینل دکھا رہا ہے؟ کوئی بعید نہیں کہ اس کے جواب میں کہا جائے، ارے بیوقوف وہ تو ایک معلوماتی پروگرام ہے ۔۔ جی جی بالکل، کے بی سی ایک معلوماتی پروگرام ہے کیوں کہ وہ دنیا نیوز پہ آتا ہے، اور اس سے ہم یہ سیکھتے ہیں کہ کورو اور پانڈو کے درمیان کتنی جنگیں لڑی گئیں ۔۔۔ خیر معلومات حاصل کرنے میں کوئی برائی نہیں ۔ لیکن دنیا پہ چلے تو معلومات، جیو پہ چلے تو مارو لات؟



اچھا وہ بوگی ووگی جو ایک اور محب وطن چینل ایکسپریس چلا رہا تھا ۔۔۔ کیا اس سے دین اسلام کی خدمت ہورہی تھی ۔۔
کوئی بعید نہیں کے جواب ملے، بھئ پاکستانی ٹیلنٹ کو بھی تو پروموٹ کیا گیا تھا، جب جگن کاظم نے ایک اور محب وطن ڈانس شو کا انعقاد کرتے ہوئے باحیا باکردار اداکرہ ثنا کو اس ڈانس شو کا جج بنایا تھا ۔۔ قوم کو یاد ہے؟ نہیں؟



اور وینا ملک یاد آگئی مجھے ۔۔ اور ایکسپریس کا ایک بے ڈھنگا چینل ہیرو بھی یاد آگیا مجھے ۔۔ اور رمضان ٹرانسمیشن میں 
وینا کا آنا ۔۔۔۔ اور یہ لائنیں بولنا ۔۔۔۔۔
پورے رمضان ۔۔۔۔۔ میں کروں گی ۔۔۔۔۔ آپ کیساتھ

استغفار ۔۔۔۔۔۔۔۔




اور میرا پیارا اے آر وائی ۔۔۔ مجھے یاد ہے میں اے آروائی میں مانیٹرنگ ڈیسک سے ہوتا ہوا ٹکر ڈیسک اور پھر پیکجنگ کی جانب گیا، بیشک میں نے اس ادراے سے کافی سیکھا ۔۔ جو ایک بات اور سیکھی تھی وہ یہ  ۔۔۔ ہیلو ۔۔۔ بھائی اورنگی میں فائرنگ دو افراد جاں بحق ۔۔ آگے سے رپورٹر پوچھتا ۔۔ ابے کون چلا رہا ہے ۔۔۔۔۔ میں جواب دیتا ۔۔ بھائی جیو چلا رہا ہے ۔۔۔ جواب ملتا ۔۔ اچھا ۔۔۔ جیو چلا رہا ہے؟ چھاپ کے چلادو ۔۔۔۔

بات یہ بھی ہے کہ اب یہ جو بھارتی مزاحیہ شو کامیڈی نائٹس وتھ کپل شرما ہے ۔۔ اس میں پاکستانیو کو تعریفی اسناد تقسیم کی جاتی ہیں؟



 شاید اب لہجہ کرخت ہوجائے

اہل بیت کی گستاخی پہ سراپہ احتجاج فوجی بوٹوں کو چاٹنے والے کالعدم جماعتوں کے اہلکار ان ننگی ٹانگوں، کھلی پیٹھوں پہ سراپہ احتجاج نہیں؟ اب بھارتی مواد کون چلا رہا ہے؟ اب بیرونی ایجنڈے پہ کون برسر پیکار ہے؟ چالیس سال تک جو قوم بوٹوں تلے دبی رہی، جس کے ساتھ آمریت نے زنا بالجبر کیا، اور کیا جاتا رہا، وہ بھی بغیر احتیاطی تدابیر کے ۔۔ تو پھر ایسی ناجائز پیداوار تو ہونی تھی ۔۔۔


میں جیو کے اس مارننگ شو کو بالکل سپورٹ نہیں کررہا ۔ جیو کیا میں کسی بھی مارننگ شو کو دیکھنا پسند نہیں کرتا۔ لیکن قوم کو اب فیصلہ کرلینا چاہیئے ۔۔ کہ اسے واقعی اصلاح چاہیئے ۔۔ یا پھر ۔۔۔ بغیر احتیاطی تدابیر کے آمریت زدہ فیملی پلاننگ ۔۔ 

Wednesday 5 February 2014

کشمیر کی پہلی گولی

اور یوں پورے پاکستان نے یوم یکجہتی کشمیر منالیا۔ 

 سوچا اپنے دوستوں سے تاریخ کا ایک پنا شئیر کرتا چلوں۔ ایک پنا اس لیئے کہ کشمیر کی 
 تاریخ ایک بلاگ یا یاک پروگرام میں بیان نہیں کی جاسکتی۔



تئیس مارچ انیس سو سینتالیس کو تحصیل باغ کے مقام نیلا بٹ میں کشمیر کے سرکردہ افراد جمع ہوئے اور انھوں نے کشمیر کو ڈوگرہ راج کے قبضہ سے چھڑانے کے لیئے مسلح جدوجہد کا فیصلہ کیا۔ اس اجلاس میں بائیس سالہ نوجوان سردار عبدالقیوم خان بھی موجود 
تھے۔



اس اجلاس کے پانچ دن بعد جدوجہدِ کشمیر کی پہلی گولی چلی، جب سردار عبدالقیوم نے ارجا نالے میں پڑاؤ ڈالے ہوئے تین ڈوگر سپاہیوں کو حملہ کر کے ہلاک کیا۔۔ غازی آباد دھیر کوٹ سے تعلق رکھنے والے سردار عبدالقیوم آگے چل کر آزاد کشمیر کے صدر اور وزیر اعظم بھی رہے۔ لیکن کشمیر کی جدوجہدِ آزادی کی پہلی گولی چلانے کی نسبت سے سردار صاحب کو مجاہد اول کے خطاب سے نوازا گیا۔



یہ تو تھا تاریخ کا ایک چھوٹا سا جائزہ۔ کشمیر آزاد کشمیر آزاد ہوگا یا نہیں، حق خود ارادیت ملے گی یا نہیں،یہ میں نہیں جانتا، جانتا ہوں تو اتنا کہ ہم نے من حیث القوم ایک دن کا اجتماعی ٹلا مار کے یوم کشمیر منایا، اور پورے دن دو چیزیں بنیں ۔۔ عوام نے بنائی ہاتھوں کی زنجیر ۔۔ اور لیڈران نے بنایا بابا جی کا ٹھلو ۔۔ ہمیشہ کی طرح!

Friday 31 January 2014

حوالدار عبدالخالق ۔۔۔۔۔ اور فیس بک

اس تصویر پر نظر پڑی، اور ایک بار پھر احساس ہوا کہ ہم ابھی تک بڑے نہیں ہوئے۔



تنقید سے پہلے میں حوالدار عبدالخالق کے بارے میں کچھ آگاہی دینا ضروری سمجھتا ہوں۔



انیس سو چوون ۔۔ منیلا کے ایشیا گیمز میں پہلی بار پاکستان کی اتھلیٹز حصہ لینے پہنچے۔ ان کھلاڑیوں میں وہ حوالدار بھی تھا، جسے بٹالین میں سزا ملتی تھی، اور انھی سزاوں نے اسے تیز بھاگنے کی تربیت دی۔ سونا پھر ایسے ہی تو کندن نہیں بنتا ۔۔۔۔ اور پھر سو میٹر کی ریس نے ثابت کردیا کہ سونا واقعی بڑا سوہنا ہے ۔۔ حوالدارعبدالخالق نے سو میٹر ریس دس اشارعیہ چھ سیکنڈز میں جیت کر ایشیا کا ریکارڈ بنا ڈالا۔



خالق سے متعلق آپ مزید بھی جان سکتے ہیں
http://en.wikipedia.org/wiki/Abdul_Khaliq_%28athlete%29

لیکن کیا صرف خالق ہی وہ اکلوتا بیٹا تھا جس نے پاک دھرتی ماں کا نام دنیا میں روشن کیا؟
نہیں

پاکستان کا وہ سپوت جس نے پاکستان کے لیئے سب سے پہلے طلائی تمغہ حاصل کیا، وہ تھا دین محمد



دین محمد نے یہ سونے کا تمغہ کُشتی کے مقابلے میں اپنے نام کیا تھا، اور مزید تین نام جنھوں نے منیلا میں سونے کے تمغہ جیتے ۔۔ وہ تھے محمد شریف بٹ، محمد نواز اور مرزا خان۔

اب بات ہوجائے اس فیس بک پکچر پوسٹ کی۔



 سمجھ مجھے یہ نہیں پڑتی کہ بھائی، ہمیں ہر بار تقابل کی ضرورت کیوں پڑتی ہے؟ میں مانتا ہوں کہ حوالدار عبدالخالق پہ کوئی کتاب لکھی گئی نہ ہی کوئی فلم نہ ہی کوئی ڈاکیومنٹری بنائی گئی۔ نہ ہی میڈیا نے کوئی توجہ دی۔ فلم؟ ڈاکیومینٹری؟ کیا بات کر رہے ہو یار ۔۔ ہم نے ابھی فلمیں بنانا ابھی شروع ہی کہاں کی ہیں۔ اس پوسٹ میں صرف بھارت اور پاکستان کا مقابلہ نہیں،  کھیلوں کا آپس میں تقابل بھی کیا گیا ہے جو کسی کسی اور کسی بھی صورت مثبت نہیں۔ مطلب اگر آپ فٹبال فین ہیں تو یہ پوسٹ آپ کے لیئے  
 نہیں۔ کیوں؟

اور جو بقیہ چیزیں اس پوسٹ میں لکھیں ہیں ۔۔ ان پہ میں کمنٹ کر نہیں سکتا ۔۔۔ آئی مین ۔۔۔ ایتھیسٹ :D

کھیل تو کھیل ہے۔ چاہے فٹبال ہو یا اتھلیٹکس۔

اور اس سے بھی شاندار انکشاف تو یہ ہے کہ کوئی بھی بھارتی فیس بک اور ٹوئیٹر پہ فارن فٹبال کلب کو
 اوون یا پروموٹ نہیں کرتا۔ اس پہ تو میں بس اتنا ہی کہہ سکتا ہوں ۔۔۔

تو بھیا کھیلو ۔۔ خوب کھیلو ۔۔ کیوں کہ کھیل مثبت مقابلہ اور اچھے معاشرے کا ضامن ہے۔ وہ زبیدہ آپا کہتی ہیں ناں ۔۔ جل کر کباب نہ بنیں ۔۔ کھل کر گلاب بنیں ۔۔

Friday 24 January 2014

عوامی اے ایف آئی سی

کراچی کی ہڑتال
بخار کی شکایت
اسپتال جا نہیں سکتا تھا
قریب ہی موجود ایک لوکل کلینک کا رخ کیا۔ نام اور جگہ نہیں بتائوں گا۔ لیکن جو بیتی وہ ضرور بتاوں گا۔

میں بتاوں گا کہ ہمارے عوام کتنے صابر و شاکر ہیں

ہوادار، روشن، حفظانِ صحت کے اصولوں کے عین مطابق، اورسردی میں ایمان کو گرمادینے والی خوبصورت خطاطی سے مزیئن در و دیوار ۔۔۔ صابر کلینک


عظیم الشان ڈسپنسری

 اب یہ ہی ڈسپنسری بھی ہے، انجکشن بھی یہیں لگ جاتے ہیں ۔۔ تلف بھی یہیں ہوجاتے ہیں۔ اور ڈسپوز بھی ۔۔ کیسا دیا؟




دو بیڈ بھی ہیں بھئی، اور بیڈ کی حالت دیکھ کر ڈی ہائیڈریشن نہ ہوجائے، اس کے لیئے ڈرپ کا بھی خاص اہتمام ہے۔ بس گھبرائیں نہیں، بسم اللہ پڑھیں اور لیٹ جائیں ۔۔ بسم اللہ ضرور پڑھ لیں، ہوسکتا ہے یہ ڈرپ لگانے کے بعد اِنا للہ ہوجائے ۔۔ آزمائش شرط ہے میرا بھائی!


صفائی کا تو خاص اہتمام ہے۔ جدید ترین آلات ۔۔


اور زخم کو صاف کرنے والی روئی سے لیکر مکس ویجیٹبل الٹی تک، سب اس کوڑے دان میں ۔۔




اسٹاف بھی کوئی اعلٰی تھا۔ یہ ہمارا ون مین آرمی ہے۔ جو ہلا
 ہلا کے دوائی بنانے سے لیکر جھاڑو ہاتھ میں لیئے صفائی تک ۔۔ سب خود کرتا ہے ۔




کیا اوقات ہوگی اس عوام کی؟ جو ڈاکٹر کے لکھے اوقاتِ کار پہ پہنچ کے مسیحا کا انتظار کر رہے ہیں۔ سمجھ مجھے یہ نہیں آتا، کہ کیا بیمار پڑنے کا بھی کوئی وقت ہوتا ہے؟ اور اگر وقت درج کر ہی دیا ہے، تو وقت پہ آجاؤ بھئی، لیکن نہیں ۔۔



تو یہ تھا عوام کا عوامی اے ایف آئی سی۔ 

دوا لے کر جب میں گھر واپس آیا تو بریکنگ نیوز چل رہی تھی ۔۔ سابق صدر مشرف کی انجیوگرافی ضروری، پاکستان 
میں کرانے سے انکار ۔۔۔

ویسے سر، آپ بہت ناشکرے ہیں

 آرمی اسپتال میں بہتر سہولیات موجود نہیں

آپ جائیں باہر امریکہ شمریکہ برطانیہ ورطانیہ جا کر علاج کرائیں ۔۔ کیوں؟

اس لیئے کہ سابق صدر ہیں؟
سابق سپہ سالار؟

اور عوام؟ وہ کہیں بھی جا کر علاج کرائے ۔۔ کرائے بھی یا کرائے بغیر سسک سسک کے مر جائے ۔۔۔ سانوں کی؟